A25, Emakumeen kontrako Indarkeria Desagerrarazteko nazioarteko eguna

Gaur azaroak 25, urtero bezala, Emakumeen kontrako Indarkeria Desagerrarazteko nazioarteko eguna ospatzen dugu mundu-mailan, eta baita LagunAron ere.

Euskal Autonomia Erkidegoko 4.500 emakumeri egindako "Emakumeen aurkako indarkeriari buruzko inkesta"-ko datuen arabera, Euskadin bizi diren 16 eta 85 urte bitarteko emakumeen % 48,2k noizbait pairatu du indarkeria-motaren bat bikotearen barruan edo kanpoan. 2 emakumetik batek. Salaketak kasuen % 15era iristen ez diren arren, emakumeen % 80k dio indarkeria horren berri ematen diela lagunei, senideei, ingurune hurbilari. Horregatik da hain garrantzitsua gizarte aktibo eta kontzientziatu bat izatea.

Testuinguru horretan, aurtengo Emakunderen kanpainak horrela dio: “Ez da zure arazoa bakarrik, gurea ere bada”. Izan ere, indarkeria matxista ez da hau jasaten duen emakumearen kontua bakarrik, jendarte osoarena da; denok aktibatu behar gara gai honen inguruan, gisa honetako jarrerak normalizatu daitezen saihesteko.

LagunAron ere gure arazo gisa ikusten dugu indarkeria matxista, eta hau desagerrarazteko bidean, Emakumeen kontrako Indarkeria Desagerrarazteko nazioarteko egunarekin bat egiten dugu!