M8, Emakumeen Nazioarteko Eguna, “Eman tokia berdintasunari” kanpainarekin

Martxoaren 8ak, berdintasunean egindako aurrerapenei eta oraindik ditugun erronkei buruzko gogoeta jartzen du erdigunean.

Martxoaren 8aren, Emakumeen Nazioarteko Egunaren ospakizuna dela eta, Emakundek, hiru foru aldundiekin eta EUDELekin elkarlanean, sentsibilizazio kanpaina bat jarri du abian: “Eman tokia berdintasunari. Emakumeen eskubideen alde esparru guztietan aurrera egiten jarrai dezagun”.

Kanpainak gogorarazi nahi du azken hamarkadetan berdintasunaren arloan aurrerapen asko egin diren arren, berdintasuna ez dela lorpen bermatua, egunero zaindu, babestu eta zabaldu beharreko espazioa baizik. Bereziki, ultraeskuinak bultzatuta, berdintasunaren bidea estutu nahi duten diskurtsoak berpizten ari diren une honetan, emakumeen eta gizonen arteko berdintasun eza ukatuz, emakumeen aurkako indarkeria hutsalduz eta feminismoa eta berdintasun-politikak mespretxatuz.

👉🏼Informazio gehiago: Emakunderen webgunea

LagunArotik bat egiten dugu “Eman tokia berdintasunari” kanpainarekin. Horregatik, aste osoan zehar gure sinadura korporatiboan kanpainaren bannerra erakutsiko dugu eta, gainera, martxoaren 12an Berdintasun Batzordeak bultzatutako ekimen bat izango dugu: “Adimen Artifizialari betaurreko moreekin begiratuz”.