Patricia Alonso

Deskribatu zure profila eta aurretiko esperientzia

Enpresen Administrazio eta Zuzendaritza ikasketak egin ondoren, finantza-erakunde batean lan egin nuen. Lehenengo, bere Finantza Eskolatik pasatu nintzen, eta, ondoren, bere aseguru-dibisiotik. Ondoren, Bilbora itzuli nintzen eta bertan balore-sozietate batean hasi nintzen, non lanpostu desberdinak ezagutu nituen. Azkenik, zorro-kudeatzaile postu bat bete nuen, eta horrek aukera eman zidan LagunArora jauzi egiteko.

Zure egunerokoa LagunAron

Inbertsioen sailean egiten dut lan, errenta aldakorraren kudeaketan; beraz, gure erantzukizuna da burtsan egiten den inbertsioa erabakitzea eta haren jarraipena egitea, dela zuzenean (akzioen edo ETFen bidez), dela zeharka (hirugarrenen kudeaketa funtsen bidez). Erabaki horiek hartzeko, ezinbestekoa da maila makroekonomikoan eta geopolitikoan gertatzen den guztiaren berri izatea, eta, horregatik, gure denboraren zati handi bat erabiltzen dugu eskura ditugun hainbat iturritako informazioa prozesatzeko (analisi-etxeak, prentsa, Bloomberg...).

Beste parametro batzuk ere egunero aztertzen ditugu, hala nola karteraren esposizioa dibisioetara, aktibo mota desberdinetara, errentagarritasunetara… eta, beti, inbertsio-aukera eta funts berriak aztertzen aritzen gara. Azkenik, aipatu behar da, lau edo sei hilean behin, Londresera eta beste finantza-hiri batzuetara joaten garela, hitzaldietan parte hartzeko eta/edo ondarea inbertituta dugun edo potentziala duten funtsak kudeatzen dituzten taldeekin biltzeko.

Zer da zure lanetik gehien gustatzen zaizuna?

Betidanik erakarri naute finantza-merkatuek; beraz, oso gustuko dut nire lanpostua eta, batez ere, dinamismoa. Egun bakoitza desberdina da aurrekoarekin alderatuta! Gure lana jasotzen dugun informazio osotik ondorioak ateratzea da, gure inbertsio erabakietan islatzeko. Bestalde, kudeatzaile talde nahiko txikia denez, gure artean laguntzen dugu elkar. Horregatik, errenta aldakorretik haratago, errenta finkora, arrisku-kapitalera eta bestelako inbertsio alternatiboetara zabaldu ditut nire ezagutzak. Gainera, nire lagun bihurtu diren lankide oso profesional batzuekin lan egiteko zortea dut, eta haiekin partekatzen dut gure lanerako gogoa.

Eta LagunArotik?

LagunAroko inbertsio-sailean lan egitea gustatzen zait, gure helburua pentsiodunentzat errentagarritasuna lortzea delako. Horrek, aldi berean, erantzukizun handia dakar, eta errentagarritasuna/arriskua binomioa oso kontuan hartzera behartzen gaitu. Gainera, kudeatzen dugun EPSVaren tamaina handiak kudeatzaile handiak eta baliabide asko eskuratzeko aukera ematen digu. Pribilegiatua sentitzen naiz Bilbotik, finantza-sektorean hain lanpostu konpletua garatu ahal izateagatik. Gainera, harro nago LagunAro osatzen dugun eredu korporatiboaren eta taldearen parte izateaz. Azkenik, familia eta lana uztartzen laguntzeko eskaintzen zaigun malgutasuna ere asko baloratzen dut.