V. Kapitulua

Estaldura hauen xedea eta ezaugarriak

124. artikulua

V. Kapitulu honetan sartutako neurrien xedea da babes berezia eskaintzea genero indarkeriaren biktima diren LagunAro, EPSVko emakume mutualistei, horrelako indarkeria legez edo behar bezala berretsitako nazioarteko tresnen bidez definitutako terminoetan sufritzen badute. Genero indarkeriaren biktima diren emakume mutualistek LagunAro, EPSVko gainerako mutualisten eskubide eta betebehar berberak izango dituzte, kapitulu honetan ezarritako alderdi espezifikoetan izan ezik.

Genero indarkeriaren biktimaren izaera genero indarkeriari buruz indarrean dagoen legediak eta Gizarte Segurantzari dagokionez indarrean dagoen legediak aurreikusitako irizpideen arabera egiaztatu beharko da. Edonola ere, V. Kapitulu honetan aurreikusitakoaren ondorioetarako, azken batean LagunAro, EPSVri egokituko zaio mutualista bati genero indarkeriaren biktima izaera aitortzea.

LagunAro, EPSVk genero indarkeriaren biktima diren emakume mutualistei emandako estaldura espezifikoak hauek dira:

1. Genero indarkeriaren biktimentzako prestazioa.
2. Neurri espezifikoak Alarguntasun prestazioari dagokionez.
3. Beste neurri osagarri batzuk.

Genero indarkeriaren biktimentzako prestazioa

125. artikulua

Genero indarkeriaren biktimentzako prestazioa zenbateko ekonomiko bat izango da, emakume mutualistak, aldi baterako edo behin betiko, Kooperatiban lan egiteari utzi behar izatearen ondorioz, genero indarkeriaren biktima delako.

Aldi baterako etenaldiak lan harreman sozietarioa etetea esan nahi du, eta hileko zenbateko ekonomiko baterako eskubidea emango du; behin betiko etenaldiari dagokionez, berriz, Kooperatibarekin duen lan harreman sozietarioa amaitzea esan nahi du, eta oroharreko kalte ordain baterako eskubidea emango du.

126. artikulua

Prestazio honetarako eskubidea eragingo dute eta onuradun izango dira aktibo, Aldi Baterako Ezintasunean, Haurdunaldiko arriskuan, Berezko Edoskitzeko arriskuan, Jaiotza eta adingabearen zaintzan, Minbizia edo beste gaixotasun larri bat duten adingabeak zaintzen eta Langabezian dauden emakume mutualista guztiak.

Genero indarkeriaren biktimentzako prestazio hori bateraezina izango da aurreko paragrafoan adierazitako prestazioak eta Prestazioen Erregelamendu honen 62. eta 30. artikuluetan aurreikusitako kalte ordainak aldi berean jasotzearekin.

Aldi Baterako Ezintasun, Haurdunaldiko arrisku, Berezko Edoskitzeko arrisku, Jaiotza eta adingabearen zaintzan, Minbizia edo beste gaixotasun larri bat duten adingabeak zaintzen eta Langabezia egoeretan, genero indarkeriaren biktimentzako prestazioa emakume mutualista jasotzen ari zen prestazioa amaitu eta gero hasiko da.

Minbizia edo beste gaixotasun larri bat duten adingabeak zaintzeari eta Langabeziari dagokienez, emakume mutualistak aukeratu ahal izango du genero indarkeriaren biktimentzako Prestazioa jasotzen hasteko unea.

Emakume mutualista genero indarkeriaren biktimentzako aldi baterako Prestazioa jasotzen ari bada, eta Jaiotza eta adingabearen zaintzagatiko prestazioaren eragilea bada, genero indarkeriaren biktimentzako Prestazioa eten egingo da, eta ondoren hasi ahal izango da berriro, kontsumitzeko geratzen den aldirako.

127. artikulua

Genero indarkeriaren biktimentzako Prestazioan sartzeko arrazoia baldin bada mutualistak bere Kooperatiban jarduera aldi baterako etetea, prestazioa kotizazio indizearen hileko kontsumo aurrerakinaren %80koa izango da (bi aparteko pagaren prorrata ere gehituta), gehi hornidura aurrerakinaren %100.

Kasu horretan, prestazioak berez sei hilabeteko gehieneko iraupena izango du, babes judizialaren eginbideen ondorioz biktima babesteko eskubidearen eraginak etenaldiak jarraitzea eskatzen duenean izan ezik. Agintari judizialak hiru hilabeteko epeetan luzatu ahal izango du etenaldia, gehienez ere hemezortzi hilabete.

128. artikulua

Genero indarkeriaren biktimentzako Prestazioan sartzeko arrazoia baldin bada mutualistak Kooperatibarekin duen harremana behin betiko amaitzea, Prestazioa oroharreko kalte ordain bat izango da, aurreko artikuluan araututako prestazioaren hileko kopuru jakin baten baliokidea.

Mutualistari dagokion hilekoen kopurua honela kalkulatuko da:

• Kotizazioko bi urtera arte, sei hileko.
• Hortik gorako kotizazio urte oso bakoitzeko, hileko bat gehiago.
• Gehienez ere hemezortzi hileko.

Mutualista berak lehendabizi genero indarkeriaren biktimentzako aldi baterako prestazioa eta ondoren amaitzeagatiko prestazioa eskatzen baditu jarraian, aldi baterako prestazioa jasotzen aritu den aldiak murriztu egingo du kalte ordaina kalkulatzeko kontuan hartu beharreko hilekoen kopurua.

129. artikulua

Emakume mutualista batek genero indarkeriaren biktima izateagatik bere lanaldia murriztu badu, 127. eta 128. artikuluetan jasotako prestazioak mutualistak lanaldia murriztu ez balu bezala kalkulatuko dira.

130. artikulua

127. artikuluan araututako genero indarkeriaren biktimentzako aldi baterako prestazioa arrazoi hauengatik amaituko da:

• Erregelamendu honetako 127. artikuluan aurreikusitako epeak betetzea.
• Lan harremana amaitzeagatik 128. artikuluan jasotako genero indarkeriaren biktimentzako Prestazioan sartzea.
• Emakume mutualista lanean berriro hastea, norberaren edo besteren kontura.
• LagunAro, EPSVko Erretiro eta Ezintasun Iraunkorreko pentsioetan sartzea.
• LagunAro, EPSVren Enplegurako Laguntzaren aurre-erretirora sartzea.
• Emakume mutualista hiltzea.

Neurri espezifikoak Alarguntasuneko prestazioari dagokionez

131. artikulua

Genero indarkeriaren biktima den emakume mutualistari lesioak edo heriotza eragiteagatik epai irmoa jaso duenak galdu egingo du mutualista horrek sortutako alarguntasun pentsioaren onuradun izaera, salbu eta haien artean behar bezala egiaztatutako errekontziliazioa dagoenean.

Kasu horretan, mutualistak eta kondenatuak elkarrekin dituzten seme-alabak umezurtz absolututzat hartuko dira Erregelamendu honetan aurreikusitakoaren ondorioetarako.

Seme-alabak adingabeak edo desgaituak badira, LagunAro, EPSVko Zurztasun Absolutuko pentsioaren onuradunak badira, inola ere ez zaio hori kondenatuari ordainduko, baizik eta seme-alaba onuradunen zaintza esleitua duen pertsona fisikoari edo erakundeari.

Kondenatu duten pertsonak LagunAro, EPSVri itzuli beharko dio horrek alarguntasun pentsioaren kontzeptuan ordaindu dizkion zenbatekoak, dagokionean.

Gainera, LagunAro, EPSVk kautelaz eten ahal izango du alarguntasun pentsioaren ordainketa, hipotesi horietan eta Gizarte Segurantzaren araudian aurreikusitako irizpide berekin bat eginda.

Emakume mutualista genero indarkeriaz hil duena ez bada, heriotzaren unean, haren ezkontidea edo izatezko bikotekidea, Kontseilu Errektoreak erabaki ahal izango du alarguntasun pentsioa ezkontide edo izatezko bikotekide horren eta heriotzaren eragileak eta hildako mutualistak izan ditzaketen seme-alaben artean banatzea.

Mutualista batek genero indarkeriaz emakume bat hiltzen badu, Kontseilu Errektoreak, Erakundearen gizarte aurreikuspeneko sistemarekiko koherentzian oinarrituta, umezurtz absolutuko prestazioa aitortu ahal izango die seme-alaba horiei. Hala, prestazio horrengatik ordaindu beharreko zenbatekoak, hala badagokio, genero indarkeria eragin duen mutualistak sor litzakeen etenaldiko mutualistaren eskubidetik deskontatuko dira.

Beste neurri osagarri batzuk

132. artikulua

Genero indarkeriaren biktima izan den emakume mutualista bati lesioak edo heriotza eragiteagatik epai irmo baten bidez kondenatu duten pertsona ezingo da izan aipatu mutualistak eragindako Desgaituentzako Laguntza, Osasun Laguntza, Heriotzagatiko Laguntza eta Etenaldiko Laguntzako prestazioen onuraduna edo hartzailea, salbu eta, dagokionean, haien arteko errekontziliazioa badago, behar bezala egiaztatuta.